Навоий вилоят кўп тармоқли тиббиёт маркази фаолият бошлади
05 февраль 2015, кўрилган: 1912
Соғлиқни сақлаш тизимидаги ислоҳотлар изчиллигини таъминлаш натижасида тиббий хизмат кўрсатиш маданияти оширилди, сифати яхшиланди. Вазирлар Маҳкамасининг 2008 йил 18 мартдаги "Ҳудудий соғлиқни сақлаш муассасаларининг ташкилий тузилмасини ва фаолиятини такомиллаштириш чора-тадбирлари тўғрисида"ги қарори асосида вилоят кўп тармоқли тиббиёт маркази фаолият бошлади.200 ўринга мўлжалланган марказ биносининг қурилиш-реконструкция ишларига қарийб 8,3 миллиард сўмлик маблағ йўналтирилди. Ўтган йил 31 августдан марказнинг маслаҳат поликлиникаси хизмат кўрсата бошлади. Поликлиника Япония гранти ҳисобидан "JICA" халқаро ташкилоти томонидан эндоскопик жиҳозлар билан таъминланди. Бундан ташқари, УЗИ, электроэнцефалограф, уретроцистископ, ЛОР комбайн, аудиометр, биокимёвий анализатор, бинокуляр микроскоп ва бошқа аппаратлар хизмат кўрсатмоқда.
Марказни ошхона, юмшоқ ва қаттиқ жиҳозлар, компьютер жамланмалари билан таъминлаш мақсадида маҳаллий бюджет ҳисобидан 365 миллион, Молия вазирлиги томонидан эса 385 миллион сўм маблағ ажратилди.
Жорий йилнинг январь ойидан 95 ўринга мўлжалланган терапия бўлимининг гастроэнтерология, кардиология, неврология, ревматология, пульмонология-аллергология, нефрология, гематология мутахассисликлари бўйича шифокорлар беморларни қабул қила бошладилар.
Ўтган йил декабрь ойида яна Япониянинг "JICA" халқаро ташкилоти билан марказнинг жарроҳлик, қабул-диагностика, анестезиология-реанимация, лаборатория бўлимларини 112 турдаги даволаш ва диагностика жиҳозлари билан таъминлаш юзасидан шартнома имзоланганди. Жорий йилда эса ана шу тиббий ускуналар олиб келиниб, ўрнатилади. Бундан ташқари, Германиянинг KFW банкининг кредит маблағлари ҳисобидан магнитли резонанс томограф, тиббий чиқиндилар инсенератори, катта ва кичик жарроҳлик жамланмалари, жарроҳлик столлари, ИВЛ, гемодиализ аппаратлари, гастро-дуодено, бронхоскоп аппаратларини олиш режалаштирилмоқда.
Агарда Сиз мақолада хатони учратган бўлсангиз, унда матнни белгилаб, CTRL + ENTER тугмасини босинг ва сайт маъмурига хабарнома жўнатинг.
Бўлими : Янгиликлар |
info |